Pacific

Tulafono Fakavae A Tokelau 

PDF Format (265kb)

Fakatomuaga

Ko kimatou, ia tagata o Tokelau, e takutino, 

Ko Tokelau e fakavae tumau i te Atua. Ko te fakavae tenei e matea i nā nuku ma kafai ona tagata e faifaimea fakatahi, ma nonofo fakatahi i te filemu ma te fiafia, 

Mai te kāloā, ko nā tālaaga ki nā fenua o Atafu, Nukunonu, Fakaofo, ma Olohega na fauhia kē fai ma o matou kāiga. Talu mai nā aho o Maui, ma Tui Tokelau ko te laukelekele, te tai, ma te ea nae fakaolaola ai o matou tagata ma ko te Atua e ia poupouakia kimatou, 

E tāua lahi kia te kimatou i te taimi nei, ke haoloto kimatou i te faiga o a matou tonu. E fakatāua ia leo o ō matou tagata uma ia matou faigātonu uma. Ko kimatou e tu tautahi, i te fakaaogāga o a matou koa, 

I te fakatinoga o aho takitahi o ō matou olaga, e fakamuamua ma fakatāua pea e kimatou a matou aganuku ma a matou tū ma nā aga, ma e fakaauau pea to latou fakatāuagia. Ko nā fakanauga a o matou tagata e tatau ke atafia ia matou nofonofoga,

Ko te kāiga, ko te fatu ia o to matou atunuku, ma ko nā faiga gali e atiake ai o matou kāiga, e fakaaogā e kimatou kē fatu ai nā faigātonu a te atunuku, 

Ko nā nuku e puna mai ai te pule katoatoa i loto o Tokelau. 

Ko kimatou, ia tagata o Tokelau, e talitonu 

I te faka-Tokelau, e aofia ai te taofi mau ki te ōlaga fakalagolago o te tahi ki te tahi e tauhi ai nā tagata fakaalofa, te tāinatiga ma te fakahoahoaga o nā koa, te tutuha o nā avanoa ke auai ai ki nā faifaiga a nā nuku, ma te āiātatau ke ola fiafia, 

Ko nā galuega uma e fai i loto o Tokelau e fuafua fakalelei ke fetaui ma nā fakanauga a tagata kua fakaali, ma e galulue mālohi ki ei kimatou ke fakataunuku ai iena fakanauga, 

I te tāua o te ola mālōlō lelei, akoakogia, ma he tulaga o te ōlaga lelei, tauhihi ki nā tulafono, talia ni huiga e kui mai ai ni fakamanuiaga mo Tokelau, aloakia o te āiātatau a tagata tautokatahi, e hē fakailoga tagata, ma ni takitaki fakamaoni, 

Ko a matou fakalapotopotoga i loto o nā nuku, e manino a latou hini ma a latou tulafono fakavae, ma e i ei o latou hao ki te atiakega o Tokelau,

Ko a matou akoakoga e tatau lava ke falite lelei ke fakafetaui ki nā manakoga ma nā fakanauga a o matou tagata, ma e tatau kē tuku he fakatāuaga ki nā iloa faka-Tokelau fakatahi ai ma nā iloa fou e manuia ai ia Tokelau. 

Ko kimatou, ia tagata o Tokelau, nei kua hokotakuau 

Mo te puipuiga o o matou kāiga ma te aganuku, ma mo te puipuiga o te tutokatahi o nā nuku i nā matakupu e patino ki a te kilatou, ma ko nā mafuaaga ia kua fakavae ai nā takiala ienei, mo te Tulafono Fakavae o Tokelau.

1 Tokelau

Ko Tokelau ko nā fenua uma, te kogātai fakalotoifale, tai hiko takamilo, ma ietahi koga e āiā ki ei ia Tokelau, i nā Tulafono Fakavāomālō.

top of page

2 Ko nā Nuku

1. Ko nā nuku kua fakanofo tonu fakatatau ki nā tulafono.

2. E filifili e nā nuku he Faipule ma he Pulenuku fakatatau ki te tulafono.

3 Fono Fakamua

1. Ko te Fono Fakamua e aofia ai nā hui ienei—

   1. Te Faipule ma te Pulenuku o nā nuku takitahi, ma
   2. E fokotahi te hui mai nā nuku takitahi, mo te toka 100 o tagata e nonofo i te nuku tēnā, fuafua ki te faitauga mulimuli o te aofaki o tagata, e tafapili ki te numela e lata ki te 100 o te aofaki o tagatānuku.


2. Ko nā hui e tofia e nā nuku takitahi fakatatau ki nā tulafono fakatātia a te nuku tēnā.
3. Ko te mataloa o te nofoakiga a nā hui ki te Fono Fakamua ke tāga tutuha ma te nofoakiga a nā Faipule.
4. Kafai e i ei he mafuaga e tatau ke huia ai he hui i loto o te taimi o te nofoakiga, e tofia hona hui e te nuku fakatatau ki nā tulafono fakatātia a te nuku tēnā.

4 Fonotaga a te Fono Fakamua

1. Ko nā fonotaga a te Fono Fakamua e uhuia, kafai e mafai, nāhe i lalo ifo i te fakalua i te tauhaga.

2. Ko te Fono a te Mālō Fakaauau ka fakatātia e ia nā aho o nā fonotaga takitahi a te Fono Fakamua.

3. E heai he tonu e tatau kē fai e te Fono Fakamua vāganā ko he lua vae tolu te numela o nā hui e i ei, fakatahi ai, e hē i lalo ifo o he tokafā o ni hui mai nā nuku takitahi.

4. (i) Ko nā matakupu uma e tuku ki te Fono Fakamua ke fai ki ei he tonu, kafai e fai he palota, e tatau ke fakaiku e te tokalahiga o nā palota a nā uhufono o te Fono Fakamua.
   (ii) Kafai he matakupu e tutuha nā palota, ko te matakupu e hēki pāhia.

5. Ko nā fonotaga a te Fono Fakamua e tatau ke fakaavanoa ki tagata uma, e tuha ai ma nā Tulafono Fakatonutonu o te Fono Fakamua.

6. Ko te Fono Fakamua e fai ana galuega i tana kikilaga e talafeagai ma fakatatau ki nā tulafono ma ana Tulafono Fakatonutonu.

7. E heai he fakamahinoga e i ei hona mafai-fakamahino ki te fakatinoga o nā galuega a te Fono Fakamua, pe ko te tauhiga o te mamalu i te Fono Fakamua e hō he tino kua ia te ia te mālohiaga ke fakatino ai te vāega tena.

8. Ko te aloakia o hō he fonotaga a te Fono Fakamua, ma te aloakia o he pepa fakamaonia e fai e te Takitakifono o te Fono Fakamua i te fakatinoga o nā tiute o te Takitakifono, e hē fakafehiligia e hō he fakamahinoga.

top of page

5 Ko nā mafai faitonu o te Fono Fakamua

1. E ō te Fono Fakamua te tiute ke pulepule nā matakupu ienei mo te manuia o te atunuku—

   1. Fakahoahoaga o te tupe a te atunuku ma te pulepulega o te tupe a te atunuku;
   2. Kaufaigaluega Tautua a te Atunuku;
   3. Ko te hokotaga a Tokelau ma Niuhila;
   4. Hokotaga Fakavāomālō;
   5. Mamalu o te Atunuku;
   6. Koa a te atunuku;
   7. Felakuakiga a te Atunuku;
   8. Fehokotakiga;
   9. Tautuaga tau meli;
   10. Taki aloakia ma nā fauhaga mo te ola mālōlō ma akoakoga a te atunuku;
   11. Tupe Tokelau mo nā tino ao tupefakamanatu; ma
   12. Hō he matakupu e kāiga ki hō he matakupu o nā matakupu ienei, ma hō he matakupu e kaumai mai nā Taupulega o nā nuku takitahi ki te Fono Fakamua mo hana onoonoga, pe ni fakatinoga fakatetulafono e fia fai.


2. 1. Ko te mafai o Tokelau ke fai ni ana feagaiga ma ietahi maliliega fakavāomālō, e tatau ke fakaaogā e te Fono a te Mālō Fakaauau.
   2. Hō he feagaiga pe ko ietahi maliliega fakavāomālō e ono mafai ke fakataunuku e Tokelau, kafai oi oti, e mulimulitaki ki he ikugāfono a te Fono Fakamua ki te tulaga tena.

3. E heai ni vāega o he feagaiga pe ko ietahi maliliega fakavāomālō, e tatau ke aloakia fakatulafono, vāganā kua pāhia e te Fono Fakamua i he Tulafono.

4. Ko nā pepa uma e tatau ke haini ki ei ia Tokelau e mafai ke hainia mo Tokelau e nā Faipule e tokatolu, pe ko te Ulu, e tuha ai ma he latou maliliega ki ei.

6 Fono a te Mālō Fakaauau

1. Kafai te Fono Fakamua e hē nofoia, ko nā galuega e fakatino ai te pule a te Fono Fakamua, e tatau ke fakataunuku e te Fono a te Mālō Fakaauau, e tatau ai, ka uma nā fakatalanoaga ieia e kikila ia e talafeagai, ke fai nā tonu e fetaui mo te lelei o te pulepulega o nā matakupu a Tokelau.

2. Ko te Mālō Fakaauau, e i loto ai nā Faipule e tokatolu, ma nā Pulenuku e tokatolu, ma ko nā tiute fakaminihita e tatau ke tufatufa ki nā hui takitahi o te Mālō Fakaauau.

3. Ko te Ulu o Tokelau ko te Takitakifono ia o te Mālō Fakaauau, ma, e hui e ia te Mālō Fakaauau, te Fono Fakamua, ma te atunuku, e veia ona fuafuagia e te Mālō Fakaauau.

4. Ko te Ulu e tatau ke filifilia e te Mālō Fakaauau mai ona hui.

5. E ō te Mālō Fakaauau te tiute ke—

   1. Fakatino nā galuega fakaauau a te mālō o Tokelau fakatatau ki nā tonu a te Fono Fakamua;
   2. Fakatino nā tonu a te Fono Fakamua;
   3. Onoono nā fakafanogātupe a nā nuku i nā fakatupega mō nā galuega e tuku ki ei e te Fono Fakamua;
   4. Tautali atu ki nā fakalavelave fakafuaheki i te atunuku;
   5. Mulimuli ki nā tonu a te Fono Fakamua, vāganā e i ei he mafuaga tatau ke fai ai he tahi tonu, ma e fakataunuku oioti kafai kua fakatalanoa muamua ma nā hui uhufono o te Fono Fakamua.


6. Ko te Mālō Fakaauau e heai hona mafai kē fatu ai ni tulafono.
7. Ko te Mālō Fakaauau e lipoti ki te Fono Fakamua i tana fonotaga ka hohoko, ana fakatinoga ki nā galuega e fakatino ai te pule a te Fono Fakamua.

top of page

7 Fatuga o nā tulafono

1. Ko nā Tulafono fakaataata e mafai kē tuku atu ki te Fono Fakamua e hō he hui o te Fono a te Mālō Fakaauau i hō he taimi.

2. Ko te Fono Fakamua e tuku atu e ia nā Tulafono fakaataata ki te Taupulega mo hana onoonoga, kafai e hēki fakatalanoa ki te Taupulega muamua.

3. I te tukuatuga o nā Tulafono fakaataata ki te Taupulega mo ni onoonoga, ko te Taupulega e tuku atu o latou manatu ka ko heki nofoia te Fono Fakamua e hohoko.

4. Ko te Fono Fakamua e ia onoonoa hō he manatu, pe ni fakaaliga kua maua mai te Taupulega, ma e mafai ke pāhia, teuteu, pe teteke nā Tulafono fakaataata, i hana kikilaga e talafeagai ai.

5. I he tūlaga fakavave, pe onoono e te Fono Fakamua e talafeagai te fakavave, e mafai e te Fono Fakamua oi pāhia ni Tulafono ko hēki onoonoa i ni fakaataataga e te Taupulega.

6. Ko nā Tulafono e fatu ka ko hēki tuku atua ki te Taupulega mo ni onoonoga, e hē toe aloakia i te aho mulimuli o te Fono Fakamua ka hohoko, kafai e fokotahi te Taupulega, pe lahi atu, e hē taliagia e kilatou nā Tulafono, ma tuku atu ni fakaaliga tuhituhia o te hē taliagia, ki te Fono a te Mālō Fakaauau i loto o he mahina e fokotahi, mai te aho na pāhia ai e te Fono Fakamua.

7. Ko te hē toe aloakia o nā Tulafono i lalo o te palakalafa (6), e tatau ke fakailoa ki tagata uma o nā nuku takitahi, e te Fono a te Mālō Fakaauau.

8  Fakamahinoga a Tokelau

1. Ko nā Fakamahinoga a Tokelau ko—

   1. Te Fakamahinoga a te Komehina Tulafono ma te Komiti Apili o nā nuku takitahi;
   2. Te Fakamahinoga Maualuga;
   3. Te Fakamahinoga mo nā Apili.

2. Vāganā e fakamatala manino mai i loto o te Tulafono Fakavae, ko te tulafono mo nā matakupu ienei, ko ieia lava kua fakatātia mai i nā tulafono a te Fono Fakamua—
   1. Ko te tulafono fakavae ma nā mafai-fakamahino o nā fakamahinoga,
   2. Ko nā agavaka e manakomia mo nā tofi tulafono,
   3. Ko nā nofoakiga ma nā tukutukuga mo nā tofi tulafono; ma
   4. Ietahi matakupu uma e fakahino ki nā fakamahinoga ma o latou fakanofonofoga.


3. Ko te Fakamahinoga Maualuga, ko kinā te fai ai te fakaikuga mulimuli, ki te fuafuaga o nā matakupu uma, i te fakauigaga ma te fakafetauiga, o te Tulafono Fakavae tenei.
4. Ko te mafai o te Fakamahinoga Maualuga i lalo o te palakalafa (3), e fakatatau ki te vāega 4 ma te 16, ma hō he āiātatau ke apili ai ki te Fakamahinoga mo nā Apili.

top of page

9 Tofiaga o nā Komehina Tulafono

1. Ko nā Taupulega takitahi e kilatou filifilia he tino, e i ei tona agavaka talafeagai ki nā iloa, poto mahani, ma takuleleia i nā nuku, ma e hē he hui e ō te Fono Fakamua, mo te tofiaga e te Fono Fakamua ke kavea ma Komehina Tulafono o te nuku tena.

2. E tofia e te Fono Fakamua, te tino na filifilia e nā nuku takitahi ma Komehina Tulafono, mo he vaitaimi e hē hili atu i he 3 tauhaga i nā tukutukuga e kikila te Fono Fakamua e talafeagai.

10 Ko nā mafai o te Fakamahinoga Maualuga

1. Ko te Fakamahinoga Maualuga e ia te ia nā mafai-fakamahino uma e manakomia ke pulepule ai nā tulafono a Tokelau.

2. Ko te Fakamahinoga Maualuga oioti te i ei hona mafai-fakamahino ke fakamahino ai he matakupu—

   1. E i fafo o nā mafai-fakamahino o nā Komehina Tulafono;
   2. E aofia ai he Komehina Tulafono i he fakamahinoga;
   3. Kua i ei ai he lukitau fakamaonia ki te fakatinoga o te mafai-fakamahino o te Komehina Tulafono.

3. Hō he fakamahino o te Fakamahinoga Maualuga, e ono mafai ke fakaaogā nā mafai uma o te Fakamahinoga Maualuga, i hō he taimi i Tokelau pe ko fafo atu o Tokelau.

11 Fakamahinoga mo nā Apili

1. Ko te tiute o te Fakamahinoga mo nā Apili e ia fakaikua nā apili e kaumai i te Fakamahinoga Maualuga.

2. Ko nā apili mai nā fakaikuga a te Fakamahinoga Maualuga e fakapitoa oioti ki nā matakupu tau te tulafono ma he matakupu tau te āiātatau.

3. Ko te fakaikuga a te Fakamahinoga mo nā Apili mo hō he matakupu, ko te ikuga lava ia.

4. Ko te Fakamahinoga mo nā Apili, e ono mafai ke fakaaogā i Tokelau, pe ko fafo atu o Tokelau.

12 Punaaga o nā Tulafono

1. Ko te Tulafono Fakavae tenei, ko te tulafono hilihili lava ia a Tokelau, ma ko ietahi tulafono uma, e tatau ke fakauiga ke ologatahi kilatou ma te Tulafono Fakavae.

2. Ko nā tulafono e hē ologatahi ma te Tulafono Fakavae, e hē fakamaonia.

3. Ko nā agaga taki kua fakatātia i te Fakatomuaga e tatau ke fakafetaui i te fakauigaga o te Tulafono Fakavae tenei ma ietahi tulafono.

4. Ko nā punaaga o nā tulafono ko tenei te fakahologa i to latou fakatāuaga, ko te Tulafono Fakavae tenei, nā Tulafono a te Fono Fakamua, nā Tulafono a nā Nuku, nā tu ma nā aga a Tokelau, ma nā agaga taki mahani o nā Tulafono Fakavāomālō.

5. I te tūlaga e heai ai ni punaaga fakatetulafono, ko te Fakamahinoga e ia fakaikua, fakatatau ki te tulafono teia e fai e ve he fakatinoga na fai e te Fono Fakamua.

top of page

13 Kaufaigaluega Tautua

1. Ko nā tofiaga ki te Kaufaigaluega Tautua a te Atunuku, ma, ki te Kaufaigaluega Tautua a he Nuku, e tatau ke tofia fakatatau ki te tūlaga kua i ei te iloa ma te agavaka.

2. Ko te fakafaigaluega i nā tautuaga a te Kaufaigaluega Tautua a te Atunuku, pe, i te Kaufaigaluega Tautua a he Nuku, e tatau ke fakatatau ki nā Tulafono a te Fono Fakamua.

14 Tupe

1. Ko nā tupehau uma e maua mai e fakaagaaga mo te Mālō o Tokelau ko ni tupe fakamua, ma e tatau kē teu ki te teugātupe a te Mālō o Tokelau.

2. E heai ni lāfoga e tatau ke fakamalohia ke fai vāganā e fakataga i he Tulafono a te Fono Fakamua.

3. E heai he tupe e tatau ke kave kehe mai te teugātupe a te Mālō o Tokelau vāganā—

   1. E totogi ai ni tupefano na fakataga mai i te fakatupega o te tauhaga tupe tena, pāhia e te Fono Fakamua; pe
   2. Fakatatau ki he tulafono a te Fono Fakamua.

15 Fenua

1. E tuha ai ma te Tulafono Fakavae tenei, pe hō he Tulafono a te Fono Fakamua, ko nā fenua uma e i lalo o te kikilaga a te Taupulega.

2. Ko nā fenua fakateaganuku, e taupau fakatatau ki nā tu ma nā aga mahani a te nuku tena.

3. Ko nā fenua fakapitoa, e hē ni fenua fakateaganuku.

4. Ko nā matakupu uma e kāiga ki nā fenua fakapitoa pe ō ai, e tatau ke fakaiku e te Fakamahinoga Maualuga ke talafeagai ma te Tulafono mahani a Egelani.

5. E heai he fenua pe hō he āiā tau fenua e tatau ke fakaheke ki he tino e hē he Tokelau.

6. Kafai he fenua e manakomia mo he fakaaogaga fakateatunuku, e tatau lava lā ke i ei he maliliega i te va o te Mālō o Tokelau, ma te nuku e i ei ai te fenua tena.

7. Kafai he fenua e manakomia mo he fuafuaga fakateatunuku pe fakatenuku, e fai nā fetukunakiga a te nuku ma nā tino e ō kilatou te fenua, ki te fakatauga pe ko te fakaaogāga o te fenua, mo ni fuafuaga fakateatunuku pe fakatenuku.

8. Kafai e hē maua e te nuku he maliliega mai nā tino e ō kilatou te fenua, ko te fenua e ono fakaaogā mo hō he fuafuaga fakateatunuku pe fakatenuku i te tukutukuga, ko nā tino e ō kilatou te fenua, kua maua muamua e kilatou ni fakamanuiaga talafeagai mai te nuku.

top of page

16 Ko nā Āiātatau o Tagata

1. Ko nā āiātatau tautokatahi o tagata uma i Tokelau, ko ieia e takua i te Takutinoga a te Lalolagi mo Āiātatau a Tagata, ma, e kitea ki loto o te Feagaiga Fakavāomālō mo nā Āiā o Tagatānuku ma Fakanofonofoga Fakafaigāmālō.

2. Ko nā āiātatau o tagata tautokatahi i Tokelau, e fakaaogā kae amanakia foki nā āiātatau a ietahi tino ma te nuku e nofo ai te tino tena.

3. Kafai he tino kua mafaufau ko he tahi o ona āiātatau e ve ona takua i te Tulafono Fakavae kua fakahēaogā pe ka fakahēaogā, e ono mafai te tino tena ke tuhi talohaga ki te Fono a te Mālō Fakaauau mo he puipuiga o te āiātatau tena

4. Kafai te Fono a te Mālō Fakaauau e malie e tuha ai ma te talohaga, e ono mafai ke fai hō hana fakatonuga i tana kikila e talafeagai mo te puipuiga o tena āiātatau.

5. Ko he fakatonuga e fai i lalo o te palakalafa (4) e ono mafai ke fakamalohia veia lava ko he fakaikuga e a te Fakamahinoga Maualuga.

6. Ko te Fono a te Mālō Fakaauau, ko kinā tē fai ai te fakaikuga mulimuli ki te fuafuaga o nā matakupu uma e tau ki nā āiātatau o tagata.

17 Hitiheni

Ko te Tulafono Hitiheni a Tokelau, ko teia kua fakatātia tonu mai i te Feagaiga o te Hokotaga Haoloto i te va o Tokelau ma Niuhila.

18 Huiga ki te Tulafono Fakavae

1. Ko te Tulafono Fakavae tenei, e mafai kē hui oioti i he ikugāfono a te Fono Fakamua, e mulimulitaki ki nā auala e fakapatino atu i te vāega tenei.

2. Ko he fakatu kē hui te Tulafono Fakavae tenei e tuku atu ki te Fono Fakamua, oi tuku atu ai lā e te Fono Fakamua ki nā nuku takitahi mō ni a latou onoonoga.

3. Ko he fakatu i lalo o te palakalafa (2) e hē pāhia, vāganā ko nā nuku takitahi kua fautua ki te Fono Fakamua i ni tuhituhiga, e lagolago ai te fakatu, ka ko hēki faia te palota a te Fono Fakamua.

19 Kamataga Aloakia, puipuiga, fakaauauga o nā huiga ki nā matakupu ma nā tulafono e i ei nei

1. Ko nā fakatātiaga mo te kamataga aloakia o te Tulafono Fakavae tenei, nā puipuiga, fakaauauga o nā huiga ki nā matakupu, te fakaauauga o nā tulafono e i ei nei, ma nā huiga ki nā tulafono e i ei nei, e fakatātia i te Matakupu Fakaopoopo.

2. Vāega 5(2)(ii), e hē fakataulia i hō he feagaiga na fai ma Niuhila i te kamataga aloakia o te Tulafono Fakavae tenei, ma hō he feagaiga venei e tāmau ai ia Tokelau mai te taimi na haini ai.

top of page

 

Matakupu Fakaopoopo

1 Kamataga Aloakia

Ko te Tulafono Fakavae tenei, e kamata oi aloakia i te taimi e fakahēai ai te Tulafono a Tokelau 1948. 

2 Puipuiga

Ko kilatou uma e taukavegia nā Tofi Filifilia Fakamua, ma te Kaufaigaluega Tautua Fakamua a Tokelau, i te taimi lava tena ka ko hēki kamata aloakia ai te Tulafono Fakavae tenei, e fakaauau pea i nā galuega kafai kua uma te fakaaloakia o te Tulafono Fakavae tenei, fakatatau ki nā nofoakiga ma nā tukutukuga na tofia ai, ma e veia lava ni tofiaga na fai i lalo o te Tulafono Fakavae tenei.

3 Fakamahinoga Maualuga ma Fakamahinoga mo nā Apili

1. Ke pa atu ki te taimi e fatu ai e te Fono Fakamua he tulafono e kehe mai, ko te Fakamahinoga Maualuga ma te Fakamahinoga mo nā Apili a Niuhila, e fakaauau pea ma Fakamahinoga Maualuga ma Fakamahinoga mo nā Apili a Tokelau, ma, i te fakaaogāga o to lā mafai-fakamahino i Tokelau, e fakaaogā ai te tulafono a Tokelau.

2. Ko nā fakahinoga uma i te tulafono a Tokelau ki te Fakamahinoga Maualuga pe ko te Fakamahinoga mo nā Apili a Niuhila e hui ke fai ma fakahinoga ki te Fakamahinoga Maualuga, ma, ko te Fakamahinoga mo nā Apili a Tokelau.

top of page

4 Ko nā tulafono e i ei nei

1. Vāganā e kehe mai he fakamatalaga e taku mai i te Matakupu Fakaopoopo tenei, ko nā tulafono uma kua aloakia i Tokelau i te taimi lava tena ka ko hēki kamata aloakia te Tulafono Fakavae tenei, fakatahi ai ma nā huiga uma e manakomia ke fai mo to latou fakatinoga i lalo o te Tulafono Fakavae tenei, e fakaauau lava te aloakia ke veia lava na fatu i lalo o te Tulafono Fakavae tenei.

2. Mo te fakaheaiga o ni mahalohaloga e takutino atu i te tuhituhiga fakatulafono mai te Kuini e aofia ai te Ofiha o te Kovana Hili o Niuhila e tatau ke fakauau te fakaaloakia veia he vaega o te tulafono a Tokelau.

3. Ko nā tulafono i lalo, ko na tulafono ia e fakahino kiei te palakalafa (1), e tatau ke kavea ni Tulafono o te Fono Fakamua ma e tatau ke fakaauau to latou aloakia—

   1. Tulafono e Fakaha ai nā Maina 1998;
   2. Tulafono o Femalagāaki I te Ea (vāganā te Vāega 8A);
   3. Tulafono mo te Puipui Fakavaomalo 1971;
   4. Tulafono Puipui Fakavaomalo 1968;
   5. Maliliega i Geneva 1958;
   6. Huiga o ni Tulafono na fai i lalo o ho he Tulafono i luga teia e aloakia i Tokelau ka ko heki kamata aloakia te Tulafono Fakavae tenei;
   7. Tupe Hiliva (Tupe Fakameaalofa) Tulafono (Numela 2) 1996;
   8.  Tupe Hiliva (Tupe Fakameaalofa) Tulafono 1997;
   9. Tupe Hiliva (Tupe Fakamealofa) Tulafono 1999;
   10. Tupe Hiliva (Tupe Fakamealofa) Tulafono 2003.


4. Ko nā tulafono uma ieia e fakahino kiei te palakalafa 3—
   1. Ki Niuhila e hui ke fakahino ki Tokelau, vāganā e manakomia kē kehe te fakauigaga;
   2. Ki te Ulu Fakatonu o Tokelau, e hui ke fakahino ki te Fono a te Malo Fakaauau;
   3. Ki te Kovana Hili ma Fakatonuga a te Fono e hui ke fakahino ki te Fono Fakamua ma ki nā Tulafono o te Fono Fakamua, vāganā e manakomia ke kehe ai he fakauigaga;
   4. Ki te Tuhituhiga Fakailoa a te Malo o Niuhila e hui ke fakahino ki te “Fakaaliga Fakamua”.
   
   
5. Tulafono a Tokelau 1948, ma te Tulafono a Tokelau (Tai Fakaatunuku ma te Hone Fagota Katoa) 1977 e he fakaauau tona aloakia i Tokelau kafai kua fakaamanakia te Tulafono Fakavae tenei.
6. Ko na Tulafono mo Pulepulega 1993 kua fakaheai.

5 Ko nā mea e tutupu ona ko nā huiga

1. I te kamataga aloakia o te Tulafono Fakavae tenei, ko nā fakatātiaga mo he tulafono e i ei nei, ieia kua opotia i loto o te Tulafono Fakavae tenei, e fakahēaogā e te Tulafono Fakavae tenei.

2. Ona ko te palakalafa (1), ko te mea ia kua fakahēai ai nā vāega ienei—

   1. Nā Tulafono Fakatonutonu a te Fono Fakamua 1(1), 1(3), 1(4), 1(15), 3(1), 3(2), 4, 5(3), 5(5), 9, 11, 12 ma te 13;
   2. Nā Tulafono o Āiātatau o Tagata 2003;
   3. Nā Tulafono o te Kaufaigaluega Tautua 2004, vāega 3(3);
   4. Nā Tulafono o nā Holigātulafono, Faiga e fai ai ma nā Fakamaoniaga 2003, vāega 112(1).


3. Ko nā fakahinoga uma i loto o nā tulafono e i ei nei e takua ai te Mālō o Tokelau, i ho he auala lava e fakamatala ai, kua hui ke fakahino ki te Mālō o Tokelau.

top of page

top of page